Сүйүү, жаштык, өлүм сүрөттөлгөн Ромео менен Жульетта
Атагы таш жарган Уильям Шекспир 1564-жылы 23-апрелде Англияда жарык дүйнөгө келип, 1616-жылы өзүнүн туулган күнүндө, 23-апрелде дүйнө менен кош айтышкан. Ал чыгармачылык чыйырында 17 комедия, 11 трагедия, 5 поэма, 150дөй сонет жазган. Канча кылым артта калса да, Шекспирдин “Ромео менен Жульеттасы” армандуу сүйүүнүн, жаштык менен ажалдын, күчтүүлүк менен назиктиктин символу катары улам жаңы муундун жүрөгүндө өлбөй-өчпөй жашап келет. Адамзат чыныгы сүйүүнүн аз сандагы каармандарын жакшы тааныйт. Алар Ромео менен Жульетта, Лайли менен Мажнун, Орфей менен Эвридика, Олжобай менен Кишимжан, Раймаалы менен Бегимай ж.б. Булардын баары адамдагы көралбастык, караниеттик, көрпенделиктин айынан жетпей калган сүйүүлөрү үчүн жан кыйышкан. Сүйүү, өлүм, арман, талкаланган жандүйнөлөр, аял менен эркектин ортосундагы комуз кылындай дирилдеген сезимдер жазуучу менен акындын, композитордун, сүрөтчүлөрдүн бүтпөс темасы.
"Азия Ньюс" гезити