Бактыбек Жетигеновдун кызматтан кете турганы каңкууланды
Кызматка келген адамдар байлык топтоо, сый-ургаал көрүү, каада күтүү жана биографиясына «баланча кызматта иштеген» деп бадырайта жаздыруу үчүн гана эмес, ошол кызматын ак дилден аткаруу үчүн келишсе, анда торгойлор койлордун үстүнө жумурткалай баштамак. Бирок, бул кыял жана жомокто гана боло турган окуя тура. Өкмөттүн Ысык-Көл облусундагы ыйгарым укуктуу өкүлү Бактыбек Жетигенов адеп аталган кызматка келгени ааламга жаңы лидер жаралгандай эле пиарланган. «Эми Ысык-Көлдү гүлдөтүп салат, туристтердин түшүнө Кыргызстан, анан Ысык-Көл гана кирип калмакчы» деген өңдүү маалыматтар тараган. Бирок, мезгил адымдап, бир жылга жакын убакыт өтсө да Бактыбек мырзанын кыйраткан иши көрүнбөй койду. Ток этерин айтканда, көзгө көрүнөрлүк бир да иш жасай алган жокпу? Угушубузга караганда, Бактыбек Жеңишбекович жакында кызматтан кетери каңкууланууда. Туура, иштеш керек, а колдон келбесе...
"Азия Ньюс" гезити
