Саясат чордонунда: “75чилер”, “кускандар”, камалгандар, кызматтан куулгандар...
Кечээ “Дасмияда” бийликти колдогон аксакал-көксакалдар чогулушуп, чай үстүндө “алтын шилекейлерин” чачыратышып, ой-да бакылдашты. Курсактары кампайып атышса, мактоо сөздөрдү аяшмак беле?
Камчыбек Ташиевди сүрөгөн “75чилердин” айрымдары бийлик тарапка өтүп кетишкени кызык. Академик Миталип Мамытов уча алып, акыл айтканга жараса, Ибрагим Жунусов менен Курсан Асанов жалындуу сөздөрүн жаадырышып, камыр-жумур аралашып кетишиптир...
Ири суммадагы алдамчылыкка айыпталып, камалып чыккан Жаныбек Кубандыков да бака-шака түшүп жүрдү. Өгүнү колуна кишен салынып, конвойлор сүйрөп жүргөнүн унутуп койгон окшойт...
Каныбек Иманалиев менен Алтынбек Сулайманов бийликти мактап сүйлөөдөн сылык түрдө баш тартышып, эстүүлүк кылышканын айтышты. Эске салсак, убагында бул экөө тең кызмат алышып, бирок көпкө узабай кубаланып кетишкен эмеспи.
Салык кызматынын төрага орун басары Адилет Дубанаев “Коррупция” беренеси боюнча айыпталган эле. Камалган. Атасы Садырбек Дубанаевдин бети кызарбай эле дастаркондо отурду го...
2020-жылдан бери Аскар Салымбековдун улам “кусканы” икаяга айланып кеткени жалганбы?
“Ынтымакчылардын” ар бирине баа берип отурсак, сөз арбып кетчүдөй. Азыноолак объективдүү чечмелегенде ушундай. Жумшак мааниде.
Кызыгы, жай саратанда эле шайлоонун шаңы сезилип, дуулдап чыгып алышты. А күздө эрикпейт окшойбуз...
