Шайлоо чырын “көркүнө” чыгарган Атазов бийликке жакпай калганда
Парламенттик шайлоодо атаандашы Нурбек Алимбековдон эки миң добуш айырмачылыкта утулган Шайлообек Атазов коомчулукка кызыктай адам катары таанылды. Атырылганы менен жеңишке жетпеди. Депутаттык кресло үчүн катуу тырмышты, митинг, ызы-чууларды жаратты. Кудайдын буйругу жок экен, жыдып калды. Бул тагдыр да. Шайлообек мырза мандаттан да жогорку баалуулуктар бар экенин жонтерисинен сезип, турмушка философиялык көз карашта ой жүгүрткөндү үйрөнсө не? Бул саам буюрбаса кийинкисинде депутат болушу ыктымал. Ага эмне анча кейип-кепчип, дүрбөлөң салат? Андан көрө башка жолдор аркылуу деле элге кызмат кылууну ойлонбойбу?.. Айрым маалыматтар боюнча, Шайлообек Атазов чырлаша берип, бийликтин кыжырына тийип алганы айтылууда. Аягы кандай бүтөрүн элестете албайбыз.
"Азия Ньюс" гезити
