Бүгүн митингчилер Ала-Тоо аянтын тазалап, жыйнап кетишти
Бишкекте "Ала-Тоо" аянтында өткөн тынчтык митинги аяктады.
Уюштуруучулардын айтымында, ага миңден ашык киши келген.
Акцияга катышкандар колдоруна ар кандай жазылган транспаранттарды көтөрүп алышкан.
Митингге келгендердин басымдуу бөлүгүн улан-кыздар түздү. Акцияга чыккандардын коопсуздугуна укук коргоо органдары да көз салып турушту.
Андан тышкары, ушундай эле митинг Каракол шаарында да өтүп, ага саналуу гана киши келген.
Митинг аяктагандан кийин «Тазалык» ишканасы акция уюштургандарга ыраазычылыгын билдирди.
Мекеменин басма сөз катчысы Жибек Каракеева «Фейсбуктагы» баракчасына «Митингден кийинки тазалык үчүн рахмат! Аянт таптаза экен. Бир да грамм таштанды чыгарган жокпуз. Адамдар баарын өздөрү тазалап кетишиптир» деп жазды.
Эскерте кетсек, жакында Япония менен Кыргызстан беттешкен футбол оюнунда да күйөрмандар стадионду тазалап кетишип, коомчулукка жылуу пикир жараткан эле.
Aryba.kg
