Бакыт Төрөбаев саясаттан куудулдукка кеткени калды окшойт
“Түнү-күнү мамлекет, эл жөнүндө ойлоном” деп ырдаган “Өнүгүү-Прогресс” фракциясынын лидери Бакыт Төрөбаевге карата коомчулукта сын-пикир күчөп баратат. Улам ойдо жок билдирүүлөрү менен элди ишендирүүгө далалат кылганы, көпчүлүктүн кыжырдануусун сезбегени таңгалдырууда. Партиясы өтпөй каларын билген Төрөбаев ар кайсы жактан “тешик” аңдып, “жең ичинен” бийликке кошомат кылып, жабыша баштаптыр. Бирок, 2017-жылы президенттик шайлоо астында Бабанов менен бириккен Бакыттын “балп” этмелерин эске салсак, анда баары теңирден тескери айланбайбы? “Мен премьер-министр болуп калсам, бизнесин да, башкасын дагы кылабыз... Курманбек Салиевичти Оштон Сооронбайлар кууп чыккан...” деп балдырап, өч алууга шымаланып турганы жалган беле? “Койнунда котур ташы бар” мындай эргул эл астында кооз сүйлөмүш этип, иш жүзүндө көздөгөнү башка болуп атса кантебиз? Кызыгы, Төрөбаевдин олуттуу болумушу куудулдардын жүрүшүнө окшошуп, саясаттан сахна жылдызына айланганы калды окшойт. Калың катмар мунун айткандарын тамаша сыяктуу көрө баштаганы жөн жерден эмес го? Аттиң, жаш туруп ишенимден чыга баштаганын карачы?!
