Бүбүсара Рыскулова: “Кыз-келиндер көп эле зомбулук көрүп жатышат, бул ачуу чындык”
Ички иштер министрлигинин маалыматына ылайык, ушул жылдын башынан бери 7665үй-бүлөлүк зомбулук окуясы катталган. Бул өткөн жылдын ушул мезгилине салыштырмалуу дээрлик 30%га көп. Бул тууралуу үй-бүлөлүк зомбулукту жоюу үчүн мыйзамдарды өркүндөтүү маселеси талкууланган жыйында айтылды. Министрлер кабинетинин төрагасынын орун басары Жылдыз Бакашова жылдан жылга үй-бүлөлүк зомбулук көбөйүп баратканын, мыйзам жер-жерлерде толук иштебей жатканына токтолду. Биз “Сезим” кризистик борборунун жетекчиси Бүбүсара Рыскулова эжеге кайрылдык.
-- Бүбүсара эже, көп эле аракеттер көрүлүп жаткандай, бирок зордук-зомбулуктун саны дале өсүүдө го?
-- Бизге кайрылгандардын учугу эң эле көп. Азайды деп айта албайм. “Дин боюнча эки аял алыш керек” дегендер дагы жок эмес. “Аялдардын орду ашканада гана” деген кепти унутушпайт. Зордук-зомбулук статистикада белгиленгендей эле, азайган жок. Бул бир уюмдун же бир эки адамдын колунда эмес. Кыргызстандыктар, зордук-зомбулукка каршы турган адамдар “үй-бүлөдөгү чыр-чатакка макул эмеспиз” деп чыгуулары керек. Көбүнчө унчукпай отурушат. Бизге кээ бир учурда “силер аз адамдар эле кыйкырып жатасыңар, зордук-зомбулук жок, өздөрү күнөөлүү” деп кайра бизди күнөөлөп чыккандар бар. Кыз-келиндер көп эле зомбулук көрүшүүдө. Бул бүгүнкүнүн ачуу чындыгы.
Жамиля Нурманбетова
"Азия Ньюс" гезити
