Рысбек Акматбаевдин улуу кызы Аима Акматбаева алгачкы жолу маек берди
Кримавторитет Рысбек Акматбаевдин улуу кызы Аима Акматбаева алгачкы жолу маек берди. Аны блогер Адилет Ногойбаев жеке YouTube каналына тарткан.
Аима Акматбаева Ош шаарында жашап, ишкерлик менен алектенет.
“Мен атамдын фамилиясы менен абдан сыймыктанам. Ал бизди күчтүү, акылдуу кылып тарбиялаган. Мен атамдын атын татыктуу алып жүргүм келет. Ал дайыма позитивдүү, ак көңүл болчу. Мен анын сөгүнгөнүн же кимдир бирөөлөр менен урушканын көргөн жокмун.
Мен Рысбек Акматбаевдин улуу кызы болом, Бишкек шаарындагы мектептердин биринде окугам. Кичине кезибизде бизди Рысбек Акматбаевдин кызы экенибизди көптөр билген жок. Биз жай турмушта чоңойдук. Эң бактылуу күндөрүбүз көп болду” деген ал өз сөзүндө.
Ошондой эле блогердин “жансакчы менен жүрчү белеңер?” деген суроосуна “жок, биз эркин өстүк. Мектепке өзүбүз эле барып келип окудук” деп жооп берген.
“Мен Оштун Ноокат районуна турмушка чыккам. Ошону менен бул жакта калдым. Алгач шаарга бала бакча ачтым, аны ийгиликтүү иштеткенден кийин мектеп ачтым. Азыр менин мектебим шаардагы эң белгилүү жана билимди эң жакшы берген мектептердин бири боло алды. Бул жетишкендиктериме жолдошумдун салымы чоң. Ал дайыма мени колдоп турат. Учурда төрт баланын энесимин. Келечекте ушул ишкерлик менен алектенип, эл аралык деңгээлдеги мектеп ачкым келет” деп маекти жыйынтыктаган.
