Каза болгон жоокер Ак-Муз айылынын кулуну, үйлөнө элек эле...
Баткендеги куралдуу жаңжалда каза болгон аскер кызматкери Ат-Башы районуна караштуу Ак-Муз айылынын кулуну, үч бир туугандын ортончусу болгон.
Агасы Амантур Кубанычбек уулу инисинин үйлөнбөй кете бергендигине өкүнүп, ичи ачышып жатканын айтты.
«Иним болгону 30 жашта болчу. Үйлөнүп алса дагы, бала калат эле. Жаным кашайып жатат. Биз үч бир туугандуу болчубуз. Карындашым бар. Иним Баткенге 12-апрелде 20 чакты аскер менен бирге кеткен. Тынчыгыча ошол жакта болушмак. Ага чейин кетип калды...
Нарында иштечү, командир болчу. Акыркы сүйлөшкөндө, “5 сааттан бери тынбай атышуу болуп жатат. Анан чалайын” деген. Түндө туугандар чалып жатышкан. Бирок айткан эмес. Эртең менен досторум угузушту.
Эмне дейм, бийликтин шалаакылыгынын айынан болбодубу», - деди ал.
Ак-Муз айыл өкмөтүнүн башчысы Нурлан Иса уулу: «Кечинде угузуп, боз үйлөрүн тигип, 5000 сомго азык-түлүк алып бердик. Үйүн тегерегин иреттеп жатабыз», - деп билдирди.
