Жашыруун никеге туруп алдым, эми аягы эмне болот?
Күйөөм менен ажырашканыма эки жыл болду. Бир кызым бар. Кудайга шүгүр, иштейм, жашоо турмушум жакшы. Кызымды эч нерседен кем кылбай багып атам. Бирок алты айдан бери бир жигит менен сүйлөшүп жаткам. Мага, кызыма болгон мамилеси аябай жакшы. Мени дайым баардык жактан колдоп турат.
Ал бойдок эле, “мен сенин теңиң эмесмин, мага көнүп калба” дечүмүн. Байкасам, өзүм деле жактырып калыпмын. Экөөбүз жашыруун нике окутуп алдык. “Күзүндө той кылып, ачыкка чыгабыз” дегенине макул болдум. Эми үч жумалык боюмда бар экен. Аны айтсам, аябай сүйүндү. “Балалуу болобуз, мага уул төрөп бересиңби?” деп сүйүнүп жүрөт. “Үйдөгүлөрдү жөнөтөйүн, той кылып алып кетейин” деп жатат. Бирок, мен ал нерсеге даяр эмес экенмин. “Баланы алдырып салалы” десем, “сен жинди болуп калыпсың! Кантип экөөбүздөн жаралган баланы “өлтүрөм” деп жатасың?!” деп урушту.
Өзүмдү коёрго жер таппай жатам. Эмне кылсам туура болот? Эгер турмушка чыгып кетсем, ишим калат, ойлогон ой-максатарымдын баары жок болот.
“Анын ата-энеси мени кандай кабыл алат?” деп да корком.
