Искендер Шаршеев, экономист: “IT жана эл аралык сатууга басым жасоо зарыл”
-- Бизнести өнүктүрүү жана аймактарга инвестиция тартуу боюна кандай кеп-кеңеш айта аласыз?
-- Инвестиция тартууда эң негизгиси элге түшүндүрүү иштерин жүргүзүүдөн башташ керек. Анткени, элде “инвесторлор эл-жерди тоноп кетет” деген эскиче түшүнүк калыптанып калыптыр. Инвесторлор менен туура иштесе, алар жергиликтүүлөргө көп киреше алып келет жана ошондой эле өлкөнүн байышына чоң өбөлгө түзүлөт.
-- Аймактардагы өнүктүрүү фонддорунан бөлүнгөн каражатты пайдаланууда эмнеге басым жасоо керек?
-- Аймактарды өнүктүрүү фонддору ириде айылдардагы өндүрүштү өркүндөтүүгө жана жолдорду оңдоого басым жасашы зарыл. Бул эки нерсе өлкөнү байытат. Ошол аймактарда курулган чакан ишканалардын товарларын дүйнөнүн ар тарабына жеткирүүгө жол ачуу менен көп нерсеге жетишебиз.
-- Пандемиядан кийин кичи жана орто ишкерликти жөнгө салуу оңойго турбаса керек?
-- Пандемиядан кийинки кадам – вакцинациялоо. Ал бизге жеткиче дагы 2-3 жыл өтүп кетиши мүмкүн. Ошондуктан алдыда кандай болорун айтуу татаал. “Эмки жылы экономикалык жактан оор болот” деп жатышат. Бирок, Кыргызстандын потенциалы аябай жогору. Ал үчүн шаан-шөкөттү токтотуп, IT, эл аралык сатуу тармагына басым жасаш керек. Башкача айтканда, майда жана чакан бизнес өзүнүн иштөө ыкмасын өзгөртүшү зарыл.
Мээрим Асанова
"Азия Ньюс" гезити
