Human Appeal International кайрымдуулук уюму курган бала-бакча жана окуу борборунун ачылышы болду
Бүгүн Чүй облусунун Аламүдүн районуна караштуу Таш-Дөбө айылында заманбап ыкмада салынган окуу борбору жана бала бакчанын ачылышы болду.
Бул ишчарага ЖК депутаттары, райондук администрация башчысы, айыл өкмөтү, жергиликтүү кеңештин депутаттары жана бул бала бакчаны, окуу борборун курган Human Appeal International кайрымдуулук фондунун Дубайдан келген өкүлчүлүктөрү катышты.
Айылда буга чейин бир да бала-бакча, мындай окуу борбору болбогонун айтышты, айылдын жашоочулары. Өткөн, 2018-жылы окуу борбору менен бала бакчанын курулушу башталган. Жергиликтүү жаш үй-булөлөр бала-бакчанын жоктугунан бөбөктөрдү кайда алып барарын билбей, көпчүлүгү жумушсуз үйдө отурушчу. Эми балдарын бакчага берип, иштегенге мүмкүнчүлүк түзүлгөндөрүн айтышты жаш үй-булө өкүлдөрү.
Бул демилгени жергиликтүү элдин өтүнүчү менен Human Appeal International кайрымдуулук уюмунун Кыргызстандагы аткаруучу директору Али Аюубов ишке ашырганына ыраазы болушту.
Human Appeal International кайрымдуулук уюмунун Кыргызстандагы жетекчиси Али Аюубов жана уюмдун аткаруучу директору Халид Абдувахаб Аль Худжа, башкы демөөрчү Абдурахман Салих Аль Салих келип, жаңы курулган окуу борбору менен бала-бакчанын ачылыш аземине катышты.
Иш чаранын ачылуу аземинде жергиликтүү эл, карыялар сүйлөп ыраазычылык билдирип, эми айылдагы мектептин эски экени жана ага окуучулардын батпай жаткандыгын айтып буга да жардам көрсөтүүнү өтүнүштү.
Эскерте кетсек, Human Appeal International кайрымдуулук уюму Кыргызстанда 15 жылдан бери иш алып барат. Өлкөбүздөгү бир нече социалдык объекттилерди курууга көмөктөшүп, мектеп, бала бакча, оорукана куруп, жетим балдарга ай сайын жөлөк пул төлөп келишет.
