Руслан Акматбек: “Кайра эле мурдагылар келип, элдин үмүтүнө суу себилүүдө”
-- Бийлик алмашканы үмүт отун жандырды, бирок кадр алмаштырууларга нааразылыктар күч алды...
-- Кадр тандоо мени да канааттандырган жок. Элдин үмүтү, күтүүсү чоң болгон. Төңкөрүштөн кийин баары жаңыча башталып, мурда-кийин бийликке келбеген, жемкорлукка аралашпаган жаш кадрлар керек эле. Ал эми баягы эле саясый соодалашуунун натыйжасында бир-эки ысымды жаңылап, кайра эле мурдагыларды алып келүүдөн натыйжа чыкпайт. Командада чечкиндүүлүк, өзгөрүү жок. Элдин үмүтүнө суу сеппеш керек.
-- Өлкөбүздө айрыкча ишкерлик, экономика туңгуюкка кептелди. Сиздерге окшогон эксперттер чогулуп сунуш жолдосоңор, балким, жардам болоор...
-- Сунуш дайыма эле айтылып келген. Массалык маалымат каражаттарында көйгөйлөр көтөрүлүп, маселелер айтылып жатат. Кеп анда эмес. Кеп, “маселе оңдойм, түзөйм, башкача жолго түшөм” деген ниеттин жоктугунда. Азыр тышкы карызды элден чогултуу айласын издеп жатышат. Бул кемчонтойлордун иши. Карызга батыргандардан эсеп сурабоо, чара көрбөө – бул жоопкерчиликтин жоктугу да.
"Азия Ньюс" гезити