Аймактарда “форма 2” менен шайлоочуларды пайдалануу чатакка айланабы?
Учурда республика боюнча 500 миңге жакын шайлоочулар “форма 2” менен добуш беришкени жатышат. Мындай аракеттер элди сатып алуу катары бааланууда. Бийликчил партияларга коомчулук тарабынан сын-пикирлер курчуду.
Маселен, Бишкек шаарынан “форма 2” амалын колдонуу анчалык кооптуу болбошу мүмкүн. Себеби, шайлоочулар көп, бири-бирин дээрлик таанышпайт. Кайдан чууруп атышканы анчалык мааниге ээ болбой калабы? Ал эми айылдарга башка жактардан ташып келишип, добуш салдыруу опурталдуу көрүнүшкө айланчудай. “Сен кайдан келдиң? Канча миң алдың? Чотур таштабайсыңбы? Энеңди с... саткынсыңбы?” деген сыяктуу кептер айтылбасына ким кепилдик бере алат? Ооба, бул олуттуу суроолор! Аймактарда, айылдарда чоочун адамдар дароо көзгө урунат эмеспи. Жергиликтүү шайлоо участокторуна тааныбагандар эле каптап киришсе, түртүшүү жаралып, жөнөкөй гана келишпестиктер урушка айлансачы? Машиналарын, бусиктерин талкалашып, баш-көз жарылса эмне болот? Дал ушул жагын бийлик ойлонду бекен? Айтор, түйүнү чейеленген соболдорду алдыңыздарга таштап, коңгуроо кактык.
Баса, “форма 2” деген эмнеден улам чыккан? Айталы, алыскы региондордон келишип, Бишкекке же Чүйгө отурукташып калышып, каттоосу туулган жеринде болгондо гана жашаган аймагынан шайлоого барууга уруксат алышчу. Мындай жагдайда бул ыкманы пайдаланса негиздүү. Ашып кетсе республика боюнча “форма 2” көрсөткүчү 30-40 миң адамды чапчымак. А азыркы көрүнүш таза чектен чыгып кетти го?..
Aryba.kg