Депутаттар каршы чыгышса, төрагалык талашка түшөбү? Шакиевдин сыры ачылууда...
Башында депутаттар Нурланбек Шакиевден айбыгышып, Камчыбек Ташиевдин жакыны катары сыпатташып, анан калса саясатка аралашкан тажрыйбалуу журналист сыңарындай көрүшүп, Жогорку Кеңештин төрагалыгына дуулдап колдоп беришкени, бирок көп өтпөй иштин баары теңирден тескери кеткендей. Урмат-сыйдан тая баштадыбы? Билими, тажрыйбасы чектелүү экени билинип, болгону айтышканга, кер-мурга жараган орто деңгээлдеги сүйлөө речи байкалып, андан жогору көтөрүлө албаганы айкындалып, ички сыры ачыкталып аткандай... Ал эми коомчулук астында Шакиев шефтерине ашкере кошомат кылганы менен таанылып, жек көрүү сезимдерин жаратканын кантебиз? Кадр саясатына ашкере киришип, мамлекеттик кызматтарга тууган-туушкандарын, жоро-жолдошторун түртө бергени менен көпчүлүк жетекчилерди тажата баштадыбы? Бир тууган инисин Бишкектин бакыйган Ленин районуна аким кылды. Анысы кесипкөйлүк жактан аксап атса, элдин эртеңки келечеги, тагдыры кантет? 2021-жылдан тарта Аксы, Чүй райондорун башкарымыш этиптир. Албетте, агасы депутат, спикер болгондон бери инисинин бактысы ачылып... Ушундай. Айрым депутаттардын баамында, Нурланбек Шакиевдин өзүнө карата күздө маселе жаралары, Жогорку Кеңештин төрагасынан алып түшүү аракеттери күн тартибине коюлары жөн жерден эмеспи? «Барбаросс операциялар» түзүлүп атканы каңкууланууда. Бүйүр кызыткан оюндарга баратат окшойбуз...
"Азия Ньюс" гезити
