Жаныбек Кубандыковдун айынан ажого сөз тийип калбайбы?
“Дос күйдүрүп, душман сүйдүрүп айтат” дейт. Анын сыңарындай, бул кабар боюнча жогору жактагылар да тынчсызданып, акыл-кеңеш иретинде сунушташты. Эмесе, биз собол салуу менен уланталы.
Президенттин кеңешчиси Жаныбек Кубандыковдун жубайы Таластан парламенттик шайлоого аттанып атабы? Бул боюнча талкуу күч алып, ар кандай жоромолдорго “жем” ташталууда. Мындайда таза шайлоо өтөрүнө да күмөн саноолор күчөйт тура. Бийлик учурда мыйзамдуулукту, калыстыкты айтып, элди ынандырууга белсенүүдө. Бирок Жаныбек Кубандыковдун аялы чындап эле шайлоого катышса, аягы кандай жыйынтыкталат? Административдик ресурс “кол ийрисине тарткан” ыкмасын пайдаланбайбы? Айтор, кандай да болбосун бийликке жакын үй-бүлөлөр саясый акцияга катышышса, баары бир жипке тизген шурудай ырааттуулук көрүлбөйт го? Кеп чыгат, анан ырбайт, ар кандай кубулуштар да орун алып кетиши мүмкүн. Аягы келип эле Жаныбек Кубандыковдун айынан президент Садыр Жапаровго сөз тийеби? Ооба, ушул жагын алдыртан ойлонуп, жети өлчөп, бир кесүү шарт. Арзыбаган мандат менен ажого көлөкө түшүрүү кимге опо? Эстүү жандар акыл калчашса керек...
"Азия Ньюс" гезити
