“Бала баатыр” аталган Кадыр Атамбаев
“Мамлекеттин укуругу узун” деп айтылып келет эмеспи. Анын сыңарындай, бийлик Алмазбек Атамбаевдин Кой-Таштагы үйүн, “Медиа форумду” алып койгону маалымдалган. Коомчулукта, соцтармакта кыйла талкуу жаралды. Албетте, бир кылка эмес. Экс-президентти колдогондор да арбын, ошол эле кезде каршы пикир жазгандар да бар. Элге маалымат жеткирүү, бийлик машинасы менен күрөшүү жагынан Кадыр Атамбаев активдүүлүгүн көрсөтүп, Фейсбуктан түз эфирге чыгып жатты. Каршылык көрсөткөнүнө күбө болдук. Бийлик өкүлдөрүнө, аркы жээктеги пиарщиктерге карата постторду жазып, соцтармактан упай алууга да жетишкени байкалды. Ошентип, Кадыр Атамбаев “Бала баатыр” аталып, саясый талаада жалгыз айгайлаганы байкалды. Төбөлдөр реакция кылышкан жок. Образдуу караганда, кол шилтеп коюшкандай... Аныгында, Кадыр Атамбаев бийликке каршы күрөшүү жолун улантып, ыңгайына жараша билдирүүлөрдү таратып, беттеген багытынан тайчудай эмес. Упай алууда. Баралына келгенде бакандай саясатчы болчудай...
"Азия Ньюс" гезити
