Олуттуу маселе: бизге Адахан керекпи, же жерибиздин бүтүндүгүбү?
Соңку убакта Адахан Мадумаров башкы прокуратурага барып, чек ара боюнча кылмыш ишине катар-катар сурак берди. Адатынча аксынып, эч нерсени моюнга албагандай түр көрсөтүүдө. Ал эми президент Садыр Жапаров кыргыз-тажик тилкелеринин талаш-тартышына, чечилбей жатканына токтолуп, Мадумаров коопсуздук кеңешинин катчысы болуп турганда кол койгон протоколунун кедери тийип атканын, Төрт-Көчө аймагынан көйгөй жаратканын билдирген. (Өзүбүздүн 275 метр узундуктагы 5 гектар жерди тажик тараптан 49 жылга арендага алганы ЖМКларда далай жазылып, талкуу жаралганы эсибизде). Сыягы, тили сайраган Мадумаровдун түбүнө Баткендеги жерге “балп” эте кол койгон катачылыгы жетип, биротоло камалып кетсе, тажиктер менен чек ара маселесин чечүүдө жеңилдиктер жаралабы? Алар Мадумаровдун протоколун бетке кармай алышпай калат, себеби, иш жүзүндө мамлекеттик документке кол койгон адамды сот кылмышкер, чыккынчы катары тааныса, Душанбе бийлиги утулабы? Ошондо эл аралык коомчулукка жүзүбүз жарык болобу? Натыйжада, кыргыз бийлиги жерин сактоодо жеңишке жетери алдыртан айтылууда. Дал ушул өңүттөгү олуттуу баскычты түшүнүү зарыл, бизге Адахан керекпи, же жерибиздин бүтүндүгүбү? Акыл калчай турган кез келди. Бул саясый куугунтук эмес да!
"Азия Ньюс" гезити
