Акыркы кабарлар
» Саясат » Саясатчы Равшан Жээнбеков эркиндикке чыкты
Саясатчы Равшан Жээнбеков эркиндикке чыкты
27-декабрь, 17:06
Бүгүн, 27-декабрда саясатчы Равшан Жээнбеков абактан бошотулду. Бул тууралуу ал Фейсбуктагы баракчасы аркылуу кабарлады.
Жээнбеков видео кайрылуу жасап, жаңы күчүнө кирген кодекстин негизинде эркиндикке чыкканын билдирди. Жактоочу Замир Жоошев 22-декабрда Бишкектин Биринчи Май райондук соту Жээнбековду тергөө абагында кармоо тууралуу бөгөт чарасын узартпаганын билдирген. Мындай чечим жаңы күчүнө кирген Жазык-процессуалдык кодексине ылайык кабыл алынган.
«Соттун мындай чечимине Равшан Жээнбековдун бир жылдан ашык абакта отурганы, айыпталуучулардын айрымдары бир жылдан ашык убакыт үй камагында болгону себеп болгон. Жаңы Жазык-процесстик кодекс бул бөгөт коюу чараларынын мөөнөтүн бир жылдан ашык узартууга тыюу салат» деп билдирген жактоочу.
Равшан Жээнбеков Кой-Таш окуясына байланыштуу айыпталып, август айында экинчи жолу камакка алынган. Ал быйыл парламенттик шайлоодо бир мандаттуу округдан депутаттыкка талапкер болгон.
