Атамбаев саясый күрөш бүтө элек экенин кыйытты
Бизге жеткен маалымат боюнча алсак, алыстагы Алмазбек Атамбаевдин ден соолугу калыбына келип, маанайы жакшы экен. Өткөн-кеткенден сабак алып, келечекке дүрбү салып, Кыргызстандагы саясый кырдаалга баа берип атса керек. (Тар чөйрөлөрдө талкуу жаралууда). Айтмакчы, өткөн аптада Кой-Таш окуясы боюнча кайрылуу жасап, керек болсо Гаага сотуна чейин барарын эскертти. Бийликке кулак кагыш кылды. Ошол эле Сооронбай Жээнбеков, Кашкар Жунушалиев жана Орозбек Опумбаев баш болгон мурдагы кызмат адамдары чагымчылык жасагандарын баса белгилеп, алар Кой-Таш окуясына күнөөлүү экенин билдирди. Ошентип, тарых барактары астында Алмазбек Атамбаев тарапташтары менен акталууга далалат жасаганы байкалды. Демек, саясый күрөш бүтө элек. Коомдук абалды таразалап, мерчемин күтүп жаткандыр. Кайсы күнү учуп келип калат болду экен?..
"Азия Ньюс" гезити
