Мелис Мураталиев жомок айтып жүрө берсин, ордуна башкасы жокпу?
Ушундай. Мамлекеттик тил комиссиясынын төрагалыгына барган Мелис Мураталиев жомок айтып, жок жосун менен бараткандай. Кала берсе, каада-салттан, уламыштардан кеп салып, өз милдетин унутуп койдубу? Кыргыз тилин өнүктүрүүнү, жайылтууну колго албай, кедеринен кетти го? Тескеп койчу билармандар кайда? Эсибизде. Бул кызматты профессор Каныбек Осмоналиев аркалап турганда көргөнбүз: мыйзам кабыл алдырып, аткаруу бийлиги менен кызыл-чеке болуп, иш-кагаздарын кыргызча жаздырууга алпурушуп, мектеп бүтүрүүчүлөрүнө эне тилден экзамен бердирүүнү демилгелеп, айтор, арбын маселелерди күн тартибине койдуруп, кирген суудай буркан-шаркан иштеп аткан. Азыр алардын бирин көрбөй калдык. Бул эмне? “Көзүм көрбөсө мейли, көчүгүмдү бөрү жесин” дегендикпи? Кайдыгерликтен качан көтөрүлөбүз? А натыйжада, сергек муун, патриот интеллигенция күйүп-жанууда. Кыргыз тилине карасанатайлык мамиле жасалып жатканы үчүн! Таңгаласың. Мелис Мураталиев кааласа жомогун өз алдынча айтып жүрө берсин, мамлекеттик тил комиссиясына чыныгы кесипкөй, ишти алдыга жылдыра турган кадрды алып келүү зарыл. А болбосо куу чөп менен оозду аарчыгандан не пайда? Ойлонолу да...
"Азия Ньюс" гезити
