Бактыбек Чойбеков, ЖК депутаты: “Ишкерлер мыйзамсыз көрүнүштөрдөн кыйналышууда”
-- Бактыбек Каныбекович, жакында эле социалдык тармактардан көрүп калдым, Таласка барып, шайлоочуларыңыз менен жолугуп келдиңиз көрүнөт...
-- Ооба, улуттук тилибиздин 35, Кара-Кыргыз автономиялуу облусунун түптөлгөнүнүн 100 жылдыгына байланыштуу Көк-Ой мектебинде балдарды ЖРТга даярдоо боюнча жаңы, заманбап кыргыз тил кабинетин ачтык. Ичинде интерактивдик панели, парталары менен. Былтыр дагы химия кабинетин ачкан болчубуз.
-- Сиздин жеке демилгеңиз боюнчабы?
-- Ооба. Жеке демилгем жана үй-бүлөлүк каражатым менен.
-- Кечээ комитеттин жыйынында кичи бизнес, чакан дүкөндөрдүн жабылуу коркунучу боюнча көйгөйлүү маселе көтөрдүңүз. Көйгөйдүн себеби эмнеде?
-- Мен “Дордой” базарынан товар алып келип, шаардагы соода түйүндөрүндө сатып жаткан ишкерлерибиз туш болгон көйгөй тууралуу айттым. Себеби, салык кызматкерлери базардан алып келген товары тууралуу счет-фактура сурап атат. Тигилерге барса, “өзгөчө режим” деп алар бербейт. Ортодо биздин ишкерлер кыйналышууда. 2-3 миллион сом турган товары болсо, санап, ошондон да 10 пайыз алышууда. Бул мыйзамсыз.
"Азия Ньюс" гезити
