Коронавирустан уулу менен энеси удаа каза болду
26-июнь күнү Жалал-Абаддын Сузак районуна караштуу Кашка-Терек айылында коронавируска чалдыгып, көз жумган 76 жаштагы аялдын буга чейин COVID жуккан уулу да каза болгон.
Анын билдиришинче, аял коронавирусту каза болгон 36 жаштагы баласынан жуктуруп алып, кечээ Жалал-Абад шаардык жугуштуу оорулар ооруканасында үзүлгөн. Учурда аны жерге берүүгө даярдык көрүлүп жатат. Коронавирус бул үй-бүлөнүн жалпы сегиз мүчөсүнө жуккан.
Эске сала кетсек, анын 36 жаштагы уулу коронавирустан 16-июнда каза болгон. Ал ооруну Бишкек шаарындагы базарлардын биринде мөмө-жемиш сатып иштеп жүргөндө жуктуруп алган. 11-июнда Жалал-Абадга куран окутууга келгенде илдеттин белгилери байкалып, оор абалда облустук ооруканага жеткирилген. Медиктердин аракетине карабастан каза болгон. Саламаттык сактоо министрлигинин айтымында, ал өз алдынча дарыланып жүрүп, илдетин күчөтүп жиберген.
