Милициянын майрамы астында генерал Сүйүн Өмүрзаков жылуу маанай тартуулады
Кылмыш дүйнөсү баш көтөрүп, улам бир ишкерди өлтүрүп аткан чакта милиция кызматкерлери паракорчулукка айыпталуу менен кармалышып, ИИМдин ички атмосферасы бузулганы жашыруун болбой калган. Тизмектесек кагаз бети түт келбейт. Кашкар Жунушалиевге мурда болуп көрбөгөндөй сындар айтылып, Кыргызстандагы эң чуулгандуу министрге айланганына баары көнүп да бүткөн. Орун басары Памир Асанов 55 жашка чыкса да мыйзамды аттап өтүп, пенсияга чыкпай тырышып, жагымсыз талкууну чыңалтып келет. Айтор, система баардык жагынан элге жек көрүнүп калган чакта, ИИМдин 1-орун басары Сүйүн Өмүрзаков коомчулукка жылуу маанай тартуулады. Каарманыбыз 25-октябрь күнү күч органдарынын спартакиадасында “Макаров” тапанчасынан ок атуу мелдешинде 87 бал топтоп, биринчи орунду алган. Бул жаңылык интернет айдыңында чоң сүйүнүчтү жаратты, себеби, буга чейин ИИМ тармагы жалаң нааразычылыктын чордонунда калган болчу. Милициянын майрамына аз калганда генерал Сүйүн Өмүрзаковдун бул жеңиши профессионалдуулуктун, кесипкөйлүктүн белгиси катары бааланды. Жакшы сөздү жаратты. Эмесе, башчылардын арасында да барандуусу, өздүк курамдын астында да өзгөчөсү бар экенине ынанып, милициядан биротоло үмүт үзбөй турсак кантет?..
Aryba.kg
