Сыймык Жапыкеев көпчүлүктү козгоп салганы үчүн азапка калдыбы?
“Чоң казат” кыймылынын мүчөсү Сыймык Жапыкеев карантин учурунда кыйналган элдин көзүн ачып, байларга асылуу менен бийликке, чиновниктерге болгон нааразычылыкты көтөрүп салган. Коррупцияга каршы күрөшүү ураанын бетке кармап, “дүрт” этип кетчүдөй кыйчалыш кырдаалдан коңгуроо каккан эле. Жыйынтыгында, Сыймык Жапыкеев, Максат Мамытканов жана Канат Хасановдор тергөөгө чакырылып, кылмыш иштердин алкагында суралууда. Ооба, Жапыкеевдин башаламандыкка карай чакырыгы лингвистикалык экспертизадан калыс каралышы зарыл. Бирок аны кыйнабай, демократия, сөз эркиндигин жокко чыгарбай, катуу эскертүү берип койсо не? Башкаларга да сабак болмок. Соңку учурда үчилтик бир ооздон үн катышып, Акүйгө чейин барышып, ИИМдин тергөөсү кыйнап жибергенин жар салышты. “Бөрк ал десе баш алгандай” ашачапкандыктын аягы көпчүлүктүн кыжырдануусун жаратпайбы?..
"Азия Ньюс" гезити
