Шаршекүл Аманова: “Жолдошум Эрлан Бекчороев абакта 11 айга жакын айыпсыз отуруп чыкты”
-- Шаршекүл, жолдошуң абакта бир жылга жетпеген убак отурду окшойт. Ушу күндөрү Кемпир-Абадга байланышкан сот иштери кантти?
-- Жолдошум Эрлан Бекчороев айыпсыз абакта 11 айга чукул отуруп чыкты. Кылмыш курамы жок экенин буга чейин жактоочулар, “кемпирабадчылар” кеңири айтышты. Жалгандан токулган том менен таанышкандарында дагы эч нерсе жок экенин айтып чыгышты. Бир кишиге коюлган айыпты баарына окшош токушкан. Эми сот процесстери башталды. Бирок сот жабык макамда өтүүдө. “Кемпирабадчылар” жана алардын жакындары соттун ачык өтүшүн талап кылып жатабыз. Сот ачык болсо, бийликке жагыныш үчүн жөн эле камап койгон ИИМ өкүлдөрүнүн калпы чыкмак. Айтор, баарын убакыт көрсөтөт. КМШ өлкөлөрүнүн саммити Бишкекте өткөнүнө байланыштуу сот иши башка мөөнөткө жылдырылган.
-- Сот иши эмнеге жабык өтүп атат?
-- Бул ишке жашыруун гриф коюлгандыктан, жактоочулар дагы ачык эч нерсе айта алышпайт. Болгону күнөөлөрү жок экенин гана айта алышат. Андан башка иштин ичиндеги материалдарды ачыктоого кылмыш жоопкерчилиги каралган. Тескерисинче, соттук отурумду ачык өткөрүп, коомчулукка ачыктаса, баардык нерсе айкын болмок.
