COVID-19: Айрым өлкөлөрдө өлүм жогорку чекке жетти
Дүйнөдө коронавирустан көз жумгандар төрт жарым миллион кишиден ашты. Россия менен Украина акыркы бир жумадан бери вирустан өлгөндөрдүн санын ооздуктай албай жатат. Эки мамлекетте тең акыркы суткадагы статистика өлүм саны жогору экенин көрсөтүүдө. Латвияда төрт жумалык толук локдаун жарыяланды.
Россияда COVID-19га чалдыккан адамдардын саны бир жумадан бери эң жогорку чекти көрсөтүүдө. Соңку бир сутка ичинде өлкөдө 34 миң 325 адамдан коронавирус табылса, 998 бейтап көз жумду. Ушуну менен орус жергесинде коронавирусту жугузуп алган жарандардын расмий саны 8 миллиондон ашты. 220 миңден ашуун жаран өпкөнү сезгенткен илдеттен каза тапты.
Расмий маалыматтарга ылайык, Россия коронавирус жуктуруп алгандардын саны боюнча дүйнөдө АКШ, Бразилия, Индия жана Мексикадан кийин бешинчи орунда турат.
"Азия Ньюс" гезити