Балбак Түлөбаев, ЖК депутаты: “Иштей албагандар, коррупцияга аралашкандар кетиши керек”
-- Балбак мырза, жана эле чет өлкөлөргө виза алуу процессиндеги башаламандыктар, күңүрт схемалар тууралуу маселе көтөрдүңүз. Аны кимдер жасап жатат?
-- Бизде Корея Республикасынын элчилиги бар. Ал жерге келген киши электрондук кезекке турат. Ошол жерде эки-үч жигит отуруп алып, 50-60, кээде 70 жолу басып коёт экен. Анан сиз келсеңиз 150үнчү, же 180-болуп кезекке турасыз. “Эми качан жетем?” деп башыңыз катып турганда бирөө пайда болот да, 300 долларга алдыңкы кезекти сунуш кылат. Процессти көзөмөлдөп, тартипке сала турган кишилер тескерисинче, аларга кошулуп акча таап жатышат окшойт. Болбосо мындай башаламандыкка жол берилмек эмес да. Мага көп бизнесмендер кайрылып, даттанып атышат. Ошондуктан, мен бүгүн укук коргоо органдарына кайрылдым. Эми текшеришет го.
-- Акыркы мезгилде бир катар министрликтер менен ведомстволордун жетекчилери алмашты. Кадр саясатында эмне үчүн туруктуулук сакталбай жатат деп ойлойсуз?
-- Иштей албагандар, коррупцияга аралашкандар бир-эки айда эле билинип калып атат. Анан алар кетиши керек да. Президент, премьер-министр таза иштеп, алдым-жуттумдарга элдешкис мамиле кылганы үчүн кадрдык курам коррупционерлерден арылып, тазаланууда. Андыктан, бул нормалдуу көрүнүш. Бир гана нерсе, президенттин 2040-жылга чейинки өнүгүү программасы бар. Министрликтердин да өзүнүн программасы бар. Улам келген жаңы министр өзүнүн программасын алып келе бербей, узак мөөнөттүү програманы улантышы абзел. Ошондо өнүгүү болот.
