Апрель баатырлары кечиргиле, Ардактап эскере албай олтурабыз
Бүгүн 87 уулубуздун башын жуткан 7-апрель окуясы болгонуна 10 жыл толду. Белгилүү акын эжебиз Гүлжамила Шакирова Апрель баатырларына арнап, төмөндөгүдөй ыр жазган. “7-апрелдеги Апрель баатырларына таазим кылып, чоң салтанат кылабыз го” деп ойлодук эле, бирок биз ойлогондой болбой калды. Ошон үчүн мурда да шейит кеткен баатырларга арнап ыр жазгам. Ушул жолу да алардын элесине арнап, “Кечиргиле Апрель баатырлары” деп ушул ырымды жаздым".
Өлкөгө адилеттик издеп жүрүп,
Өмүрдү жакшы ойлорго түздөп жүрүп,
Өрт жаштар, "оңолтобуз жашоону" деп,
Түбөлүк жай таптыңар, биз деп жүрүп.
Анда да жаз жадырап жайган таңын,
Акүйдө барын билбей айбандарын.
Соо жерден согуш ачып бийлик тарап,
Соолдуңар сексен жети кайрандарым!
Кейитет, кеткениңер кабырганы,
Калп болду келген бийлик, ак урганы.
Арадан он жыл минтип өтсө дагы
Адилет, Элдик бийлик табылбады.
Дагы эле курган элим куруп жатат,
Бийликтер өз билгенин кылып жатат.
Башка элге баш урушкан жандар чыгып,
Жараткан так төбөдөн уруп жатат.
Ошентип кесепеттер оору апкелип,
Кайырчыдай ар кимге кол сунабыз.
Апрель баатырлары кечиргиле,
Ардактап эскере албай олтурабыз.
