Улукбек Кочкоров: “Кыйын кырдаалда керт башын ойлогондорду кусур урат!”
“Арыбаңыздар калайык калк!
“Жер-жерлерде мамлекет берген ун сатылып, матрезервдин унун саясый партиялар өз атынан элге берип жатат, өкмөт курттаган ун таратууда” деген маалыматтар чыга баштады.
Эгерде чын эле өкмөттүн бекер уну элге сатылып жаткан болсо, кайсы бир саясый партия өкмөттүн унун өз атынан элге таратып жатканы анык болсо, өкмөттүн кампасынан таратылып жаткан ун курттап кеткени далилденсе, анда ушул фактылар боюнча тиешелүү адамдар мыйзам алдында жооп бериши керек.
Урматтуу туугандар, жогорудагы көрүнүштөргө күбө болуп калсаңыздар, далилдей турган материалдар колуңуздарга тийип калса, дароо укук коргоо органдарына кайрылыңыздар. Андан сырткары, биздин 0990 60 30 30 ватсап номерибизге дароо кайрылыңыздар!
Мындай шалаакылыкты, өзүмбилемдикти чогуу токтотолу. Күнөөлүүлөр жоопкерчиликке тартылышы керек. Ушундай кыйын кырдаалда керт башынын камын ойлогон наадандарды кусур урат!
Эң оболу, биз коомдун мите курттары менен күрөшүүбүз керек!” деп министр Улукбек Кочкоров Фейсбуктагы баракчасына билдирүү жазган.