Полковник Мыктыбек Болушев түз жүргөнү, адамгерчилиги менен бааланууда
Негизинен ГУУРдун ишмердигине оң баа берсек болот. Себеби, а жерде “карт бөрү” Мыктыбек Болушевдин орун басар катары үзүрлүү иштеп атканы белгилүү. Тажрыйбасына жараша көп жылдан бери ээрден түшпөй келатат. Каарманыбыз табиятынан түз жүргөнү, адамгерчилиги менен башкалардан айырмаланып, туруктуу адамдардын арасынан аброй тапканын танбайбыз. Балпайып сый үстүндө жүрө берсин!
Эми мынча болду, катуу келген маалыматты кебезге орогондой узатып коёлук. “Кой аксагы менен миң” дегендей, коңгуроо кагалы. ГУУРдун ичинде көлдүктөр менен таластыктардын ажырымы кетип баратабы? Тымызын ыркырашып, бирок ачыкка чыга алышпай күбүр-шыбырдын деңгээлинде жүрүшкөнү кандай? Былчылдаша мушташып кетишпегей эле... “Шамал болбосо чөптүн башы кыймылдабайт” демекчи, бул аңызга алдыртан маани берели да...
Бирок Мыктыбек Болушев көлдүктөргө, таластыктарга да кошулбайт экен. Ал – Кыргызстандык!
