Бакыт Дегенбаев: “Жарандык коомдор, саясатчылар – баарыбыз туруктуулукту ойлонолу”
-- Саясый туруксуздук, “шайлоону жокко чыгаралы” деген пикирлердин экономикага, ишкерликке таасири кандай?
-- Бизде акыркы жылдары тез-тез кайталана баштаган саясый туруксуздук, жакшы эмес жагдайлар, шайлоого баланыштуу чыр-чатактар экономикага, ишкерликке жакшы таасирин тийгизбейт. “Кыргызстанга инвестиция тартат элем” деген ишкерлер кооптоно баштады. “Иштесемби? Же токтотуп койсомбу?” деген ойго түртпөй койбойт.
Ички инвесторлорубуз – биздин ишкерлер, өндүрүшчүлөр эки ача ойдо болуп, күмөн санап, жумушка толук кирише албайт. Бийликтегилер, саясатчылар ушунун баарын эске алса дейм.
Жарандык коом, биз баарыбыз жетекчилер, жетекчи эмеси, фермерлер, ишкерлер, шаардыктар, айылдыктар – жалпы баарыбыз ынтымакта иштин жүрүшү, экономиканы көтөрүү үчүн далалаттансак. Шайлоодо тыйын-тыпыр берсе ала коюп, алданып калганыбыз, сатылып келгенибиз ушул күнгө алып келип жатат. Бул экономикага терс таасирин тийгизбей койбойт.
Жамиля Нурманбетова
"Азия Ньюс" гезити
