Күйөөм көп жолу талак берди, бирок ажырашкан жокпуз...
Биздин үйдө тынчтык көпкө созулбайт. Эки күндүн биринде эле урушабыз. Кээде майда нерседен башталган сөз чоң жаңжалга айланып кетет. Ачууланганда экөөбүз тең өзүбүздү кармай албай калабыз. Ошондой учурларда мен да бир нече жолу күйөөмдөн талак сурагам. Ал болсо ачуусуна алдырып, көп жолу талак бергенин айткан. Бирок кызыгы, ошол сөздөр айтылгандан кийин деле кайра жарашып алып, эч нерсе болбогондой эле жашообузду уланта берчүбүз.
Убакыт өткөн сайын жүрөгүмдө тынчсыздануу күчөй баштады. «Биздин никебиз дагы эле күчүндөбү же жокпу?» деген суроо беймаза кылууда. Ошондуктан жолдошум экөөбүз бул маселени тактоо үчүн диний аалымдарга кайрылдык. Оштогу, Бишкектеги да бир нече аалымдар менен сүйлөштүк. Алар биздин окуяны угуп чыгып, эгер талак белгилүү шарттар менен берилген болсо, анда нике бузулганын, андан кийинки жашообуз шарият боюнча туура болбой каларын айтышты. Айрымдары: «Калган жашооңор зынаага айланып калат, бул акыретте оор жоопкерчилик жаратат» деп эскертишти.
Ошол сөздөрдү уккандан бери жандүйнөм тынч эмес. Бир жагынан күйөөм менен көп жылдан бери бирге жашап келатабыз. Ортобузда балдарыбыз бар. Канчалык урушсак да, үй-бүлөбүздүн бузулушун каалабайм. Балдарымдын атасыз чоңоюшун элестетүү мен үчүн өтө оор. Бир үйдө жашап, бир өмүрдү өткөргөн адамдан ажырап кетүү да оңой эмес экен.
Экинчи жагынан болсо, акырет тууралуу ойлоном. Эгер аалымдардын айтканы туура болсо, анда Аллахтын алдында жооп берүүдөн корком. Бул дүйнөдөгү убактылуу жашоону ойлоп, акыреттеги абалымды оорлотуп албайын деп да тынчсызданам. Кээде түнкүсүн ушул ойлордон улам уйкум качат. Бир чечимге келе албай кыйналам.
Азыр мен чоң тандоонун алдында тургандай сезем. Бир тарабы – үй-бүлөмдү сактап калуу, экинчи тарабы – диний жоопкерчилик жана акырет коркунучу. Кайсы жол туура экенин билбей турам. Эмоцияга алдырып чечим чыгарып алуудан да корком. Ошондуктан мындай абалга туш болгон адамдардын кеңешин, диний билими күчтүү адамдардын оюн уккум келет.
Нурайым
