Тамила Маматова таланттуу, жогорку деңгээлдеги скульптор экен
(Тамила Маматовага!)
Айкөл Манастын айкели элибиз ичинде чоң талкууну жаратты. Бош жаткан адамдар сынчыл болот эмеспи. Көбүнчө жамандагандарды соцтармактан окуп жаттым. Өкүнүчтүү. Балким майда кемчиликтер кеткендир, бирок жалпысынан Тамила айымдын эмгегине жогору баа берем. Эркектер намыска жарабаса, анан кантебиз? Ала-Тоо аянтындагы Манастын эстелиги өзүбүздүн бийлигибизге, элибизге жараша тургузулду. Балким кийин оңолуп, өзгөрүүлөр жаралса, ал жагын да убагында көрөлү. Азырынча Тамила Маматованын эмгегине ыраазы болуп, колдоп коёлу. Өтө деле өөн учураган кемчиликтерин байкаганым жок. Бул жагынан профессионал скульпторлор айтышса, ошолор ой-пикир бөлүшсө жарашат. Ал эми эч нерсени түшүнбөгөн көпчүлүк ооздорун чойгондон эмне пайда табабыз? Негизи Тамила Маматова таланттуу, чыгармачылыгы жогорку деңгээлде өнүккөн скульптор экени талашсыз. Анын башка эмгектерин көрүп жүрөбүз. Суктандырат. Өнөрү өркүндөй берсин! Мындай инсанды колдоп, жөлөк-таяк гана болушубуз керек. Кыскасы, аянттагы Манастын айкели бийлигибизге жараша тургузулду. Төлгө сыңарындай... Ушул таризинде ой калчап көргүлөчү? Бул жөн сыр болбосо керек...
Эдил
"Азия Ньюс" гезити
