Чыңгыз Макешов: “2022-жылы Кыргызстандын экономикасы 7%га өстү”
Экономика министринин орун басары менен маек.
-- Чыңгыз мырза, жыл жыйынтыгына карата экономиканын абалы, өсүштөрү тууралуу кайчы пикирлер да жок эмес. Адис катары сиздин маалыматыңыз менен таанышсак?
-- 2022-жылы Кыргызстандын экономикасы 7%га өстү, бул жакшы көрсөткүч. Соода тармагынан, айыл чарбадан салык түшүрүү жагынан, экономикалык активдүүлүктүн жыйынтыгы, натыйжасы десек болот. ИДП 7%га көбөйүп, жалпысынан 781 миллиард 288 миллион сомду түздү. Бул 2022-жылдын январь-ноябрь айларынын көсөткүчү. 2021-жылы болсо 6029 миллиард 327 миллион сомду түзгөн. Ушул көрсөткүчтөр менен караганда, ИДПнын жалпы 7%га өскөнү көрүнүп турат. Эң негизги өсүүнү өндүрүш тармагы көрсөттү. Ал тармактан жалпысынан 2,5% ИДПнын көбөйүшүнө алып келди. Айыл чарба тармагы 1%ды, тейлөө тармагы 1,94%ды кошту. Ал эми 1%ы болсо продукцияларга болгон таза салыктардан келди. Кайсы тармактан кандай өсүү болгонун берилген цифралар менен так, даана байкадыңыздар. 2023-жылы да бул көрсөткүчтөрдүн жогорулай турганына ишеним чоң.
Жамиля Нурманбетова
"Азия Ньюс" гезити
