Улгайган адамды урган Конор Макгрегор айыппул төлөп, кечирим сурады
Белгилүү ирландык мушкер Конор Макгрегор атак-даңкынан улам урунаарго тоо, урушаарга жоо таппай өзүнүн ээн ооз сөздөрү, чоң муштуму менен коомчулукка таанылып келет.
Ал жазында улгайган адамды урганы үчүн сот жообуна тартылып, айыппул төлөдү.
Дублиндин аймактык соту ирландиялык мушкер, UFC уюмунун мурдагы чемпиону Конор Макгрегорду барда отурган кары адамга кол көтөргөнү үчүн миң еврого айыпка жыкты.
Ушул жылдын 6-апрелинде Макгрегор барда отургандарды өзүнүн бренди менен чыккан вискиден куюп сыйлаган. Бирок ал жактагы улгайган адам ичимдик ичүүдөн баш тарткан. Мындан улам мушкер аны бир муштаган.
Кечээ Дублинде сот отуруму болуп, Макгрегор күнөөсүн мойнуна алган.
"Туура эмес кылыптырмын, жабырлануучу менен соттон кечирим сурайм. Мындай окуялардын кайталанышына жол бербейм", — деди Конор күнөөсүн мойнуна алып.
Соттон кийин Конордун жактоочусу спортчу жабыркаган кишиге компенсация төлөп берген.
Эскерте кетсек, Макгрегор 2018-жылы 6-октябрда АКШда UFC 229 турниринин алкагында өткөрүп, россиялык Хабиб Нурмагомедовго утулуп калган.
Aryba.kg
