Кошоматтын “чапанын” Нурбек Сыдыгалиев кийбей эле койсо...
Бийликке “адвокат” болгон Нурбек Сыдыгалиевди билсеңер керек. Эркин ой жүгүрткөн депутаттар менен кер-мур айтышып, жогору жакка “жакшы көрүнүп” турбаса башы ооруйбу? Кээ бир адамдарга ушундай мүнөз сары майдай жагып, адат кылып алат эмеспи. Кызыгы, бул вице-спикерди айрым журналисттер сындап коюшса, аларга да чалып, териштирип, омуроого алгысы келгени эмнеси? Ушундай да болобу? Саясатчы элдин көзүндө, ага дайыма ачуу-таттуу сөз айтылып турушу керек. Өзүн чынтийбес сезгени жарабас. Артка кылчайсак, кайсы гана президент болбосун, алардын да жагалданган депутаттары болор эле. Бийликти сындагандар менен айтышып, талашып-тартышып, атургай жакалашууга чейин барышчу. Азыр алар кайда? Сыйга татыксыз да. Баары өтөт, кетет. Бир гана кошоматчылар элдин эсинде кандай образда каларын чечмелебей эле коёлу. Андай “чапан” чапташып, оңой менен жондон түшпөй калат. Мына ошондой жексурлуктан Нурбек Сыдыгалиев сактанса (!) деген гана кеңеш айтабыз.
"Азия Ньюс" гезити
