Курманкул Зулушев Элмирбек Иманалиевге “КР Баатыры” наамын ыйгарууну сунуштады
Бүгүн Жогорку Кеңеште акын Элмирбек Иманалиевге "Кыргыз Республикасынын Баатыры" наамын ыйгаруу тууралуу сунушун депутат Курманкул Зулушев көтөрүп чыкты.
Өлкөдө саналуу гана таланттуу манасчылар бар экенин белгилеген депутат "аларга жөлөк пул берүү үчүн жаңы мыйзам долбоорун иштеп чыгуу керек. Өнөр адамдары каза болгондон кийин жаш төкпөй, тирүү кезегинде жардам берүү маанилүү. Мүмкүн убагында жетишерлик колдоо көрсөтсөк, мындан да көп эмгектерди жаратышмак" деген пикирин айтты.
"Элмирбек Иманалиевге бул наамды тирүүсүндө ыйгарсак, ал макул болмок эмес. "Кыргыз Республикасынын Баатыры" наамы согушка катышкан, эрдик жараткан инсандарга ыйгарылат эмеспи. Аны маданият өкүлүнө ыйгарууда талаш маселе жаралат. Бирок акынга кайсы гана наамды ыйгарбайлы, ал баарына татыктуу” деп маданият министринин орун басары Нуржигит Кадырбеков кошумчалады.
