Өкмөт менен коронавирус кетпесе, “талаа командирлери” чыгабы?
30-апрелде карантин бүтүшү керек. Бирок өлкөбүз коронавирустан арылчудай эмес, күнүгө жугузгандар катталууда. Эгерде өзгөчө абал алынса, эл жабырап көчөгө чыгышса, пандемия ого бетер курчубайбы? Карантинди узартса кандай болот? Карды ачкан карапайым калк чыдабай кетип, бийликтин “тизгин тартуусуна” баш ийбей, кырды бычак кырдаал жаралбайбы? Жашоочулардын 70%ы оор шартка кептелди. “Оңго барсаң атың, солго барсаң өзүң өлөсүң” дегендей эле көрүнүшкө күбө болгон турабыз. Мындайда жергиликтүү “талаа командирлери” өкмөт башчы Абылгазиевди кетирүүгө, коронавирусту жеңүүгө кол кабыш кылышабы? Үмүт “үшүп” турган чак. Экономикабыз эңшерилген, өндүрүш өчөйгөн, финансылык ресурстар “итке минген” абалда. Мындай шартта күчтүү премьер-министр келип, жаңы команда менен курч кризиске батып бараткан өлкөбүздү саздан сууруп чыгышы керек. А болбосо көпчүлүктүн чыдамы түгөнүп баратат. “Айткандын оозу жаман, ыйлагандын көзү жаман” дегендей, алдыртан коңгуроо какпасак, эртең кеч болуп калбайбы?..
Aryba.kg
