Айбек Жумагулов жүк көтөрүп, системанын "былык-чылыктарын" билдирбей баратат...
Жол кыймылынын коопсуздугун камсыздоо башкы башкармалыгынын начальниги Азенбек Козукеевдин дараметин, кандай деңгээлде экенин айланасындагы формачандар жакшы билип калышыптыр. Чечмелөөнүн кажети деле жок. Башкасын айтпасак да, жума сайын жүрөк титиреткен жол кырсыктары, адам өлүмдөрү же жаракат алгандардын арбыганы өкүндүрөт.
Аракети майнапсыз болсо, Азенбек Козукеев көпкө деле узабай калды го? Парламенттен депутат Эрулан Кокулов кандай гана жарга такап салганын көрдүңөр да. Баркы кеткени ушулбу? (Кала берсе, Жеңиш Жоробековдун убагында системада ыраттуулук, тартип орноп, коррупция кан буугандай токтогонун билебиз. Генералга алмашкыс кадр экен!) Азыр болсо кедеринен кеткени жалганбы? Өздүк курамдагылар эле саймедиреп атышат го?..
Айтмакчы, үмүттүн шооласы үзүлбөгөн сыңарындай, жол кыймылынын коопсуздугун камсыздоо башкы башкармалыгынын орун басары Айбек Жумагулов мекеменин жүгүн көтөрүп, көп "былык-чылыктарын" билдирбей баратканын айтышты. Негизги иш-чараларды башкарып, олуттуу чечимдерди ушул орун басар жайгарып жатыптыр. Бирок, Айбек Жумагулов канчалык жакшы иштебесин, жетекчиси Азенбек Козукеев аксап турса, абал кайдан жакшырмак эле?
