Марлен Маматалиев кыйын кырдаалда “ойт” берип кетпейби?
Ошентип, Марлен Маматалиев парламент төрагасына шайланды. Бул кадр Алмазбек Атамбаевдин бийлиги учурунда кызматка, бизнеске да аралашып, Өмүрбек Бабановдун командасында иштеп, Сокенин учурунда мандат алып, 2020-жылы Райымбек Матраимовдун “Мекеним Кыргызстан” партиясы менен шайлоого аттанып, элге таанылганы эсибизде. Анан Октябрь төңкөрүшүнөн кийин эки доско ыктап, 2021-жылы “Ынтымак” партиясын жетектеп, парламентке өтүп келген. Андан бери бийликчил депутат катары ордун таап, амалкөйлүгү аркылуу Садыр Жапаровго жакындап алды. Жыйынтыгында, Жогорку Кеңештин төрүнө жетип отурат. Калыс караганда Марлен Маматалиевдин билими, тажрыйбасы жетиштүү, өз милдетин аткарып кетеринен шек санабайбыз. Бирок ал саясатта күч каякта болсо, ошол жакка ыктап, жеке карьерасын жасоонун кыныгын алганы жашыруун эмес. Ток этерине келсек, Марлен мырза президенттин туруктуу командасы болуп бере алабы? Бу таризде так кесе айта албайбыз. Кыйын кырдаалда “ойт” берсечи? Оомал-төкмөл заманаң ушундай тура. Эртең бийликке башка бирөө келсе, анын да арыгын чаап кетсечи? Өзгөчө саясатчылар сымаптай кылтылдап турган убакта ишенүү кыйын го...
