Министрлерди “тизген” Каныбек Туманбаевдин кыйындыгы
14-октябрда президенттин иш башкармалыгынын башчысы Каныбек Туманбаевдин төрагалыгы астында ШКУ саммитине жана Дүйнөлүк көчмөндөр оюндарына даярдык көрүү боюнча экинчи отурум өткөнү кабарланды. Жыйында Жээнбек Кулубаев баштаган бир катар министрлерге тапшырмалар берилип, негизги багыттар боюнча деталдуу пландардын даярдалышы белгилениптир. Баракелде!
Аныгында Каныбек Туманбаев кыйын экен. Кызматы президенттин иш башкармалыгы болгону менен бир катар министрлерден баштап, дээрлик чиновниктерди тизгиндеп, астына кыдырекей отургузуп алып, мамлекеттик маанилүү кеңешмелерди өткөрүүдө. Бул көрүнүшү менен өлкөдөгү 3-фигура катары күчүн тастыктап, тамырын терең жайып, президенттин эң ишенимдүү жандоочуна айланган кербези. Баары эле мындай боло албайт. Таң бериш керек. Сыягы, ушул темп менен кетсе, келечекте Каныбек Туманбаев бийлик мураскери катары позициясын бекемдөөгө жетишеби? Ошого бараткандай...
"Азия Ньюс" гезити
