Өлүм жазасы менен өтө оор кылмыштарды тизгиндей албайбыз
Коомчулукта өлүм жазасын киргизүү талкууга алынууда. Албетте, бул машакаттуу көрүнүш. Айталы, өтө оор кылмыштарга карата өмүр бою эркинен ажыратуу эле жетет. Адамга мындан өткөн жаза барбы? Ал эми өлүм жазасын киргизгенде, ар кандай чийеленген, түйүндөшкөн жагдайлардан улам күнөөсүз адамдарга да жалаа жабылып, курмандыкка кабылсачы? Ансыз да сот, прокурорлор жипке тизген шурудай бир калыпта таза эмес да. Айрым коррупциялашкан фемида өкүлү “жан алып” атканын элестетип атасыңарбы? Негизи укук тармагындагы алешемдик кокого жетип турат да. Андыктан, ашкере мыкаачылыкта кылмыш жасагандар мыйзам үстөмдүгү менен гана өмүр бою эркинен ажыраса жетиштүү. Чыныгы азап ошол... Ириде коомду агартуу, идеологиялык таризде аң-сезимди өстүрүү милдети ишке ашса гана айлана-чөйрөгө таасир эте алмакпыз.
"Азия Ньюс" гезити
