Атамбаевди сындаган Абдрахманов ажодон автоунаа алганда
Сооронбай Жээнбеков бийликке келип, Алмазбек Атамбаев менен каршылашып, тиреш күчөй баштаганда Сагынбек Абдрахмановду жардамга чакыргандай ишарат жасалган. Ошентип, агезде ички интригалардын очогунда кайнаган эле. Үкасы Асылбек Жээнбеков аркылуу КСДПга ээлик кылууга жетишип, ич ара ырк кеткени эсибизде. Аныгында АША менен тирешкен Соке 2020-жылдагы Октябрь төңкөрүшүндө бийлигин алдырып, жайдак калбадыбы. Кыйчалышта Абдрахманов да көрүнбөй кетип, бирок соңку убактарда Атамбаевди сындап, кайрадан чыга баштаган. Кызыгы, жакында ал ажонун сыйына татып, автоунаа алганын коомчулукка жарыялады. Ошого катар тоо-кен тармагында кызмат кыларын да жашырбады. Эске салсак, 2010-жылдын 7-апрелинен кийин Абдрахманов Чүй облусунун губернатору катары кыска аралыкта иштеген. Агезде Атамбаевдин командасына кошулуп жүргөнү билгилүү эле.
"Азия Ньюс" гезити
