Иманкулов жомок айталбаса, мамкатчылык жоюлуп кетпейби?
Сүйүнбек Касмамбетов 65 жашка чыкканын баса белгилеп, жаштарга орун бошотууну ниет кылуу менен Фейсбукка пост жазганын окуганбыз. Ат тезегин кургатпай мамлекеттик катчылыкка ошол эле курактагы Марат Иманкулов дайындалды. Бул киши орган кызматкери. Улуттук идеология, адабият, маданият боюнча кабары болбосо, кесиби туура келбесе, кызмат берсе эле жулунуп келип отуруп алганы түшүнүксүз. Буга чейин коопсуздук кеңешинин катчысы катары деле кыйратып иштегенин көргөн жокпуз да. Эми мамлекеттик катчылыкты кантип эптейт? Жөө жомок айталбаса, жоюлуп кетпейби? Айтор, кызык эле күндөр уланууда. Негизи кадр таңкыстыгы, татыктуулар аба менен суудай зарылдыгы байкалып калды. Мыктылар, билимдүүлөр чет өлкөгө кетип жатышса, же жеке ишкерликте жүрүшсө, аларды мамлекетке кызматка тартуу кыяматтай кыйынчылык жараткандай. Убакыттан уттура баштадык. Өкүнүчтүү.
"Азия Ньюс" гезити
