Клара Сооронкулова Садыр Жапаровду сынга алды
Азыркы президенттин жанында жакшы иштей турган адам жок болгондуктан, кард саясаты начар болуп жатат. Мындай пикирин конституциялык палатанын мурдагы жетекчиси Клара Сооронкулова «Маралга» берген маегинде билдирди.
Анын айтымында, «саясатка барам, мамлекетти башкарам» деген адам өзүнүн командасын бир топ жылдар бою түптөп, анан бийликке келет. Азыркы президент күтүүсүз жерден шайланып калганына байланыштуу тегерегинде иштеп бере турган, ишке жарай турган адамдар байкала элек.
«Негизи өлкөнү башкарам деген адамдын жанында жок дегенде маанилүү кызматтарга дайындала турган 10 киши керек. Азыркы президент болсо өзүнө да, коомго да күтүүсүз жерден мамлекет башчы болуп шайланып калды. Мына ушул себептенби, анын жанынан жакшы иштеп бере турган адамдарды көрө элекмин. Ошондуктан кадр саясаты абдан начар. Көчөдө бакырып жүргөн адамдарды эле кызматтарга дайындап жатат. Негизи, кандай саясат болбосун, бардык нерсени кадрлар чечет» деди Сооронкулова.
