1,1 кг героин, 13 жыл мөөнөт. Сот сатылабы? Эмирлан Зарылбек уулунун аракети
Ириде орган кызматкерлери, жетекчилери, алардын жакын туугандары таза, жипке тизген шурудай ырааттуу болушу керек. Тилекке каршы, бизде ашмалтайы чыккан көрүнүштөр бар. Мындай шартта эмнеге карап турабыз? Тазалануу зарыл. Абийири жокторду адилеттүү чечим менен четке сүрүү учурдун талабы.
“Карышкырга кой кайтарткан замана” дейт. Октябрь РИИБ начальниги Эмирлан Зарылбек уулунун бир тууган иниси Э.З. өтө оор кылмышка айыпталып, күнөөсү далилденип, 13 жылга күчөтүлгөн тартипте соттолгон. УКМК тарабынан 1,1 кг героин менен кармалганын эскертип коёлу. Моралдык, мыйзамдык жагынан алганда, осол көрүнүш жаралып, этикага сыйбай калды. Бир тууганы өтө оор кылмыш менен түрмөдө жатса, Эмирлан Зарылбек уулу Октябрь РИИБни жетектеп отурат. Коомчулук астында тескери үлгү да, туурабы? Коопсуздукту, тартипти кантип талап кылат? Бетке чиркөө иш болуп атпайбы! Жалпы милициянын беделине сөз тийүүдө... Анан калса, Эмирлан Зарылбек уулу инисин Чүй облустук сотунан чыгарып алуунун айла-амалдарын кылып, жанталашып жатканы айтылууда. Азыркы учурда сотторду сатып алуу кеп бекен? Паракорчулук, коррупция күчөп турган кези го? Мындай шартта УКМК көзөмөлгө алабы? 1,1 кг героин менен кармалган адам акталып, агасынын арты менен абактан чыгып кетсе кантесиңер? Ошондо УКМКны да көзгө илбей калышабы? Көрө жаталы.
"Азия Ньюс" гезити
