Аззамбек Жээнбай уулу: “Инвесторлор келиши үчүн саясый туруктуулук маанилүү”
JIA бизнес-ассоциациясынын аткаруучу директору менен маек.
-- Кыргыз ишкерлеринин чет өлкөлүктөр менен байланышы, бул тармактын келечеги тууралуу кандай ойдосуз?
-- Өлкөбүзгө чет өлкөлүк инвесторлор келиши үчүн бизден ыңгайлуу шарттар керек. Бул үчүн мыйзамдык база жетиштүү. Бирок ошону ишке ашырууда маселе болуп жатат. Бул убактарга чейин айрыкча биздеги саясый туруксуздук инвесторлордун келишине чоң жолтоо болуп келген. Ошол себептүү сырттан акчанын агылышы үчүн саясый туруктуулук маанилүү. Анткени бизнес тынчтыкты тандайт, өзгөчө чет элдик ишкерлер коопсуздукка өзгөчө маани беришет. Ошондуктан ишкерлерге, инвесторлорго жагымдуу климат түзүүгө мамлекет да түрдүү аракеттерди көрүүдө.
Учурда чет өлкөдөн чоң инвесторлор келгени өтө сейрек. Жогорудагы маселелерден сырткары, биздин рынок инвесторлор үчүн өтө чакан. Тоо-кен, энергетика тармактарынан башка тармактар анча маанилүү эмес. Ошон үчүн биз ички инвесторлордун потенциалын туура колдонушубуз шарт. Качан ишкерлер Кыргызстанда иштегенге кызыкса, оюн эрежелери ачык жана түшүнүктүү болсо, ошондо гана башка тармактарга инвестиция кыла башташат. Акыркы учурларда бизде IT жана кызмат көрсөтүү, креативдүү бизнестерден кызыктуу стартаптар чыгып жатат. Мына ушуларга ички инвесторлорду колдонсок туура болот.
"Азия Ньюс" гезити
