Жентек той өткөргөн тургундун атасынан коронавирус аныкталды
16-июнга карата Кыргызстанда дагы 100 адамдын анализинен коронавирус инфекциясы аныкталды. Алардын ичинен экөө Ысык-Көл облусунун тургундары. Бул тууралуу эртең мененки онлайн маалымат жыйында саламаттык сактоо министринин орун басары Нурболот Үсөнбаев билдирди.
Коронавирус аныкталган жарандын бири Жети-Өгүз районунун тургуну. Ал 1961-жылы туулган. Буга чейин 4-июнда коронавирус анын 1997-жылы туулган уулунан табылган. Ал 22-25-май күндөрү Бишкек шаарында болчу. Андан кийин Ысык-Көл облусуна келип, жентек той өткөргөн. Тойго 20 киши катышкан.
16-июнга карата Ысык-Көл облусунда коронавирус менен жалпы 333 адам катталды. Алардын ичинен 14 адам сакайып, ооруканадан чыгарылган. Жети-Өгүз районунда жалпы 5 адамдан коронавирус аныкталып, экөө сакайды.
Ал эми Кыргызстанда коронавирус жуктургандардын жалпы саны 2472 адамга жетти. Алардын ичинен 1847 бейтап айыкты.
