Азамат Кенжебаев: «Украинадагы согуштун тагдыры АКШдагы 2024-жылы өтчү шайлоодон көз каранды»
– Путиндин бүгүнкү абалы тууралуу кандай ойдосуз?
– Путиндин абалы жакшы эле. Себеби, акыркы сурамжылоолор көрсөткөндөй, Россиянын элинин 80%дан ашыгы анын жүргүзүп жаткан саясатын колдоорун көргөзүүдө. Салыштырып карасак, АКШнын президенти Байденди 30%дын тегерегинде эли колдойт. Россиянын экономикасы киргизилген масштабдуу санкцияларга карабастан туруктуулугун сактап турат, социалдык тармакта чыңалуу жок, демек, жаңы шарттарга ыңгайлаша алды.
– Украина-Россия тиреши ушул темпте улана береби? Кандай жол издешет?
– Россия-Украина согушу ушул темпте улана берет, себеби, Украина өз саясатын жүргүзүүдө. Өз алдынчалыгын жоготкон мамлекет, аны АКШ жана Улуу Британия баш болгон Батыш өлкөлөрү башкарып турушат. Алар Украинаны курал-жарак менен эле камсыз кылбастан, бюджетин да толтурууга аргасыз, болбосо, ал мамлекет бир жуманын ичинде урап түшөт. Бул согуштун токтошу АКШдан көз каранды, алар качан токтосо, ошондо согуш аяктайт. Менимче, Украинадагы согуштун тагдыры АКШдагы 2024-жылы өтчү шайлоодон көз каранды. Ошондо кимдин президент болуп келиши чоң таасирин тийгизет. Ага чейин ушул темп улана берет деген ойдомун.
"Азия Ньюс" гезити
